Isa 56 | NdeIBE | STEP | Nanku okutshiwo nguJehova: “Londoloza ukulunga wenze okuqondileyo, ngoba ukusindisa kwami kuseduze lokulunga kwami kuzabonakaliswa masinyane.

Isaiah 56

Ukusindiswa Kwabanye

1 Nanku okutshiwo nguJehova: “Londoloza ukulunga wenze okuqondileyo, ngoba ukusindisa kwami kuseduze lokulunga kwami kuzabonakaliswa masinyane.

2 Ubusisiwe umuntu okwenzayo lokhu, umuntu obambelela kukho, ogcina iSabatha engalingcolisi, athibe isandla sakhe ekwenzeni okubi.”

3 Owezizweni osezinamathisele kuJehova kangavunyelwa ukuba athi, “Ngeqiniso uJehova uzangehlukanisa labantu bakhe.” Njalo lomthenwa kangavunyelwa ukusola athi, “Mina ngiyisihlahla esomileyo.”

4 Ngoba nanku okutshiwo nguJehova: “Abathenwa abagcina amaSabatha ami bakhethe okungithokozisayo, babambelele kusivumelwano sami –

5 ngizabanika, phakathi kwethempeli lami lemiduli yalo, isikhumbuzo lebizo elingcono kulamadodana lamadodakazi. Ngizabanika ibizo elingapheliyo. elingayikukhohlakala.

6 Labezizwe abazinamathisela kuJehova ukuba bamkhonze, bathande ibizo likaJehova, njalo bamkhonze, bonke abagcina iSabatha bengalingcolisi, babambelele kusivumelwano sami –

7 laba ngizabaletha entabeni yami engcwele, ngibaphe intokozo endlini yami yokukhulekela. Iminikelo yabo yokutshiswa, lemihlatshelo, kuzakwamukelwa e-alithareni lami; ngoba indlu yami izathiwa yindlu yokukhuleka yezizwe zonke.”

8 UJehova Wobukhosi – yena oqoqa abaxotshwayo elizweni abako-Israyeli uthi: “Ngizaqoqela abanye kubo futhi ngaphandle kwalabo abavele sebeqoqiwe.”

UJehova Usola Ababi

9 Wozani lonke lina zilo zeganga; wozani lidle, lonke lina zilo zamagusu!

10 Abalindi bako-Israyeli bayiziphofu, bonke kabazi lutho; bonke bayizinja eziyizimungulu, ezingeke zikhonkothe. Bayalala nje baphuphe; bayakuthanda ukulala.

11 Bayizinja ezihalalela ukudla, ezingasuthiyo. Bangabelusi abangaqedisisiyo, bonke bazazenzela abakufunayo, lowo lalowo udinga inzuzo yakhe.

12 Lowo lalowo uthi, “Wozani, ngilethe iwayini. Kasinatheni utshwala sibusuthe. Kusasa kuzafana lalamhla loba kube ngcono kakhulu.”